ملف جوجل حاسبي لتقسيم حصص ملكية مشروع بنظام الاستحقاق التدريجي Startup Equity and Vesting Calculator Google Sheet

 بعد ما اتفقتوا على جدوى الفكرة واتحمستوا لتأسيس شركة ناشئة... حان وقت الاتفاق على بنود الشراكة وتقسيم الحصص.

مهم جدا ان الخطوة دي تتعمل صح... وبدري بدري... والكل يكون مقتنع وراضي بالطريقة والنتيجة... وإلا هتحصل مشاكل كتير بعدين وقد ينتج عنها فشل وانتهاء المشروع تماما.

بالنسبة لبنود الشراكة... فمن الممكن البدء باستخدام نموذج اتفاقية مؤسسين ابتدائية واللي فيها بند من البنود لتحديد نسبة حصص كل شريك وده اللي هنركز عليه دلوقتي على مرحلتين.


أولاً: تحديد النسب الأولية لحصص الملكية


طرق تقسيم الحصص كتير... لكن أعتقد ان أسهلهم وأكثرهم عدلا زي الطريقة اللي شرحها محمد خضر واختصارها (مع بعض التعديلات) كالآتي:

  1. كتابة قائمة بالمهام والأدوار الرئيسية في المشروع. (مثل: الفكرة - رأس المال - الادارة - التصميم - البرمجة... إلخ)
  2. تقييم كل مهمة مالياً عن طريق وضع سعر/تكلفة السنة الأولى بالألف جنية أو الألف دولار (مثل: راتب سنوي - تكلفة شراء.... إلخ)  وسنعتبر إجمالي تقييم جميع المهام هو إجمالي حصص ملكية المشروع بفرض ان السهم الواحد = 1 جنية أو دولار.
  3. تحديد مساهمة كل شريك في كل مهمة بوضع نسبة بين 0% إلى 100% بحيث ان اجمالي المساهمة من جميع الشركاء في كل مهمة لوحدها يبقى 100%.
  4. حساب نسبة حصة كل شريك في المشروع بالكامل. (الصفحة الأولى بملف جوجل شيت الحسابي المرفق ستحسبها تلقائياً)

 

ثانياً: تغيير نسب حصص الملكية (الاستحقاق التدريجي)

بيحصل كتير ان بعد تقسيم حصص ملكية المشروع، يتضح ان في شريك أداؤه أقل من الآخرين... أو غير ملتزم بمواعيد تسليم مهامه... وبالتالي من الضرورة الاتفاق على طريقة لتغيير نسبة حصة كل شريك بالمشروع حسب مدى إلتزامه بمهامه ومسؤولياته.


أحد أشهر الطرق لتحقيق ده... نظام اسمه ”الاستحقاق التدريجي“: Vesting

واختصاره كالآتي (مع بعض التعديلات):

  1. تحديد فترة الاستحقاق التدريجي (الافتراضي هو 4 سنوات) وفترة المنحدر أو الحد الأدنى (الافتراضي هو 12 شهر).
  2. تحديد فترة دورة المهام (الافتراضي هو 2 أسبوع) وبالتالي هنعرف اجمالي دورات المهام خلال فترة الاستحقاق التدريجي (حوالي 105 دورة) وبالتالي يسهل حساب قيمة/حصة كل دورة لكل شريك.
  3. لو شريك مالتزمش عدد دورات متتالية (2 مثلا) يتم خصمها من حصته... أما لو استمر غير ملتزم لمدة كبيرة (5 مثلا) فلابد من خروجه من المشروع.
  4. لو خرج شريك قبل انتهاء فترة المنحدر... يخرج بدون امتلاك أي حصص.
  5. لو خرج شريك بعد انتهاء فترة المنحدر لكن قبل انتهاء الاستحقاق التدريجي... يخرج ويستمر في امتلاك نسبة من حصته تتناسب مع دورات المهام اللي اتمها إلى إجمالي دورات المهام. (مثلا لو خرج بعد 2 سنة، يخرج ومعه نصف حصته الأولية)




الصفحة الثانية في ملف جوجل شيت الحسابي المرفق بتحتاج فقط إدخال تاريخ بداية أول دورة مهام وتقييم كل شريك في كل دورة (المقبول علامته صح بالأزرق) وهي بتشوف تاريخ اليوم تلقائيا وبتحسب كل شريك أصبحت حصته الجديدة المستقبلية كام (بالبرتقالي) وحصته اللي تم استحقاقها بالفعل كام (بالأخضر... وطبعا هتفضل صفر طوال فترة المنحدر).


تفعيل نظام الاستحقاق التدريجي في مصر والعالم العربي عموما فيه شوية تحديات... هتعرفها من المحامي بتاعك لما توصلوا لمرحلة التأسيس الرسمي وتوثيق واعتماد العقود... فمثلا المتعارف عليه برة، ان الحصص المخصومة بتختفي تماما ولا يتم نقلها للشركاء الاخرين... لكن ممكن المحامي يقولك ده ماينفعش ولازم ننقلها لحد... في الحالة دي يتم نقلها للشركاء الاخرين طبعا بالتناسب مع حصة كل واحد فيهم...... الملف فيه الطريقتين.


ملف جوجل الحسابي

ده لينك الملف: Google Sheet 

هتحتاج تاخد منه نسخة على أكونت جوجل بتاعك وتفتحه من لابتوب عشان تقدر تجربه وتستخدمه  File: Make a copy

لكن تقدروا تكتبوا فيه تعليقات للاستفسارات والاقتراحات... او تكتبوا هنا.


أعذروني لو الملف فيه أخطاء من أي نوع وأتمنى تبلغوني بيها مباشرة... وللأسف الصفحة التانية من الملف بتكون بطيئة أحيانا لأن بعض الخانات فيها معتمدة على كود بيتم تشغيله كذا مرة... وممكن تشوفوا الكود عن طريق Tools: Script editor.


بالتوفيق للجميع وفي انتظار رأيكم :)

#علم_تتعلم

M. Sherbeeny

مهندس اتصالات داعم للتخفف..
بحب التكنولوجيا وريادة الأعمال والشركات الناشئة بهدف تحسين جودة الحياة..
بشارك تجاربي وخبراتي بالمصري لدعم المحتوى العربي

facebook twitter linkedin

1 تعليقات

تعليقاتكم إضافة مفيدة لجميع القراء.. شكرا لكم.

أحدث أقدم