برنامج مجاني لمتابعة أماكن أفراد العائلة وسرعة القيادة وبطاريات الهواتف



أنا عايش مع أسرتي في أقصى غرب القاهرة... واخواتي البنات شغلهم في أقصى شرق القاهرة!

بابا وماما... وأنا طبعا.. بنكون قلقانين عليهم من أول مايخرجوا لحد مايرجعوا... حتى من قبل ماتزيد حالات الخطف المنتشرة حاليًا.... ومابالكم بقى دلوقتي القلق والخوف حاليًا بقى عامل ازاي!

عشان كده دورت على برنامج مجاني يخلينا كلنا نعرف أماكن بعض في أي لحظة عشان نطمن على بعض... والحمد لله لاقيته... وبقينا بنستخدمه باستمرار... حتى مع أحمد أخويا اللي في السعودية عشان نتطمن على بعض.





آخر موقف حصلنا مع البرنامج ده ان اخواتي الاتنين كانوا في وسط البلد وتايهين من بعض... وبعد مافشلوا يلاقوا بعض بالمكالمات، قاموا فاتحين البرنامج واتحركوا في اتجاه بعض لحد ما اتقابلوا والحمد لله D:


الاستخدامات الممكنة
  • مع الأسرة: مكان كل فرد وخط سيره ونسبة البطارية (ضروري للإنقاذ في حالات الخطف)
  • حتى لو هتستخدمه لوحدك... يمكنك معرفة خط سير موبايلك من الويب سايت (ضروري في حالات سرقة الموبايل)
  • مع باص المدرسة أو باص الشغل لمعرفة مكان الباص اثناء تحركه عشان مايضيعش عليك ولا تأخرهم.



البرنامج اسمه

بيخليك تعمل جروب
(بيسموها circle)
وتضيف فيها الناس اللي عايز تطمن عليهم... أطفالك وزوجتك مثلا.
وبتحدد الأماكن اللي عايز يجيلك منها إخطارات
(أو notifications)
لما أي حد في الجروب يدخل الأماكن دي أو يخرج منها.


المميزات
  • خريطة عليها مكان كل شخص في الجروب.
  • نسبة البطارية بتاعة كل شخص.
  • عرض تحركات كل شخص في آخر 24 ساعة (النسخة المدفوعة بتحتفظ بآخر 30 يوم).
  • كل تحرك كان خط سيره ازاي وأخد وقت قد ايه وسرعة قد ايه.
  • حفظ الأماكن المتكررة (البيت - المدرسة - الشغل - وهكذا).
  • استقبال إخطارات لما حد من الجروب يدخل أو يخرج من الأماكن دي. (النسخة المجانية بتخليك تختار 2 فقط من الأماكن المحفوظة بتاعتك)... وممكن تعمل لايك على الدخول والخروج عشان تطمنهم انك عرفت.
  • استقبال إخطارات لما حد من الجروب يكون بيتحرك بسرعة. (يعني راكب عربية)
  • استقبال إخطارات لما حد من الجروب بطاريته هتخلص.
  • إمكانية تحديد أشخاص للطوارئ من خارج الجروب.. بحيث لما حد من الجروب يدوس على زرار Help Alert يتبعت رسالة طوارئ للجروب + لأشخاص الطوارئ ... فيها مكان اللي بعت الرسالة.
  • إمكانية الشات جوا البرنامج مع كل الجروب أو مع شوية منهم.
  • إمكانية إضافة جروبات أخرى.
  • إمكانية تعطيل مشاركة المكان (اللوكاشن) في أي وقت. (يعني ممكن مثلًا اتوبيس الشركة او المدرسة يعمل جروب والناس تدخل عليه... ويفتحوا اللوكاشن وقت الركوب.. ويقفلوا اللوكاشن باقي اليوم)


مما لا شك فيه
ان البرنامج ده مناسب للي بيخافوا على بعض.. وبيثقوا في بعض.. ومفيش بينهم حساسيات... وبيهتموا بسلامة بعض أكتر من أي حاجة تانية.

وطبعا غير مناسب للناس اللي شايفين انه برنامج مراقبة وتجسس وتعدي على الخصوصية وكده وبتاع.



الخطوات
البرنامج ده مجاني... بس عليه بعض القيود عشان يخليك تشتري النسخة الكاملة.... يعني مثلا النسخة المجانية بتخليك تختار عدد قليل جدا من الأماكن (2 فقط لكل جروب مجاني) يجيلك منها إخطارات.... وحل الموضوع ده انك تعمل أكتر من جروب (حوار ممل شوية)... أو تدفع 25 دولار في السنة وتستفيد بمميزات أكتر.


  1. هتحتاج انترنت دائم على موبايلك... شوف مع شركتك ايه أفضل باقة ”غير محدودة“ ليك... (أرخص حاجة في فودافون مثلا: باقة شهرية بـ 7.5 جنية بتديك 200 ميجا وتزود عليها باقة إضافية ”بلا حدود“ بـ 10 جنية بحيث ان الانترنت يفضل شغال بسرعة 32 كيلوبايت بعد ما تخلص الـ 200 ميجا... يعني اجمالي 17.5 جنية في الشهر... جربتها وشغالة كويس مع البرنامج ده.. بس طبعا مش هتشغل فيديوهات وصور فيسبوك وواتساب أو غيرهم... أخرك شات).
  2. نزل البرنامج على الأيفون من هنا أو على الأندرويد من هنا.
  3. اشترك على البرنامج... وبعد كده اعمل Create Circle.
  4. لو ده أول جروب تعمله فهو اتوماتيك بيسميه Family.
  5. بعد كده هيقولك invite new members.
  6. هيطلعلك كود... تبعته للي عايز تضيفهم على الجروب (طبعا لازم البرنامج ينزل على موبايلاتهم هما كمان ويشتركوا فيه وبعد كده يكتبوا الكود في Join Circle).
  7. بعد كده هتعمل اضافة لأول مكان مهم... البيت Add Home.
  8. اختار مكان البيت على الخريطة واعمل save.
  9. عشان تزود مكان تاني... دوس على القايمة واختار Places--->Add.
  10. بعد مايبقى عندك كذا مكان.. ومعاك كذا شخص في الجروب.. روح على قايمة الأماكن تاني وهتلاقي ان في مكانين فقط هما اللي Places with alerts.
  11. ادخل جوا كل مكان فيهم واتأكد انك معلم على الأشخاص اللي يهمك يجيلك إخطارات عنهم لما يدخلوا أو يخرجوا من المكان ده.
  12. لو عايز إخطارات عن البطارية... افتح القايمة وادخل على Battery.
  13. لو عايز إخطارت عن التحركات السريعة (السواقة او المواصلات).. افتح القايمة وادخل على Driving.
  14. كل ماتحتاج إخطارات عن مكانين زيادة... افتح القايمة ودوس على Create Circle.
  15. وكرر الخطوات من أول خطوة رقم 5 بدون ماتضيف البيت تاني.. يعني ممكن تخلي أول مكان في الجروب الزيادة يبقى اي مكان تاني غير البيت وتديله اسم مختلف.


وخدوا بالكم... البرنامج بيحتفظ بتحركات آخر 24 ساعة فقط للنسخة المجانية... فإذا حصل أي مشكلة لحبايبكم (ربنا يحفظهم) ادخلوا على البرنامج وخدوا سكرين شوت زي دي قبل مايمسحوا التحركات القديمة:






ممكن كمان تدوسوا على كل خريطة وتعملوا زووم وتاخدوا سكرين شوت على التفاصيل.


ده كان شرح سريع لأساسيات البرنامج... اتمنى يفيدكم بإذن الله.

وده كمان برنامج تاني عشان تتطمن على حبايبك وهما قاعدين في البيت: تحويل الموبايل لكاميرا أمنية

ربنا يحفظلكم حبايبكم ويحفظنا جميعًا من كل سوء.
ويسعدني أجاوب على أي استفسارات ليكم.
M. Sherbeeny

مهندس اتصالات داعم للتخفف..
بحب التكنولوجيا وريادة الأعمال والشركات الناشئة بهدف تحسين جودة الحياة..
بشارك تجاربي وخبراتي بالمصري لدعم المحتوى العربي

facebook twitter linkedin

إرسال تعليق

تعليقاتكم إضافة مفيدة لجميع القراء.. شكرا لكم.

أحدث أقدم