اهجر واتساب زي ماتحب.. لكن ماتديش فرصة لحد يأذيك ويقفلك حسابك عليه للأبد!
ولا كمان حد يزعجك بإضافات الجروبات عمال على بطال
رغم الهجرة الجماعية اللي بتحصل حاليا من واتساب إلى سجنال وتليجرام بسبب انتهاكات الخصوصية.. إلا انه مهم اننا نعمل اللي علينا لحماية نفسنا من أذية المجرمين عن طريق واتساب أو غيره
للأسف واتساب هتقفل حسابك للأبد لو لاقوك عضو في جروب فيه مخالفات غير قانونية جسيمة
خصوصا لو اسم الجروب وصورته واضح فيهم المخالفات دي
ودي ثغرة بيستخدمها المجرمين في أذيتك لو انت ماعملتش الخطوات اللي هذكرها تحت
المجرم بيجيب رقم جديد (أو رقم قديم متسجل عندك)... ويعمل جروب عن أي حاجة ممكن تهمك ويضيفك عليه.. ثم يغير اسم الجروب وصورة الجروب إلى حاجات مخالفة جدا جدا اللي مفيهاش تهاون عالميا اطلاقا.. ويعمل ريبورت على الجروب.. ويخرج منه.
واتساب بتشوف الريبورت خلال دقائق أو ساعات بالكتير.. وبتعمل حظر دائم لكل اللي في الجروب.
واتساب بتعمل كده بلا تردد.. وبيقفلوا حوالي ٢ مليون حساب لأسباب مختلفة.... شهريا !
في كذا مجموعة حصل فيها الموضوع ده على سبيل الهزار.. مثلا واحد من الأدمنز غير فقط اسم الجروب لاسم مخالف يخض جدا.. ومحدش عمل ريبورت حتى.. ورجعوا اسم الجروب الاصلي بعدها بدقائق... بس برضو الذكاء الصناعي بتاع واتساب كان سجل اسم الجروب المخالف وعملهم حظر دائم كلهم.. وطبعا أعضاء الجروب حاولوا يتواصلوا مع الدعم الفني وماعرفوش يشغلوا حساباتهم تاني.
طب ازاي تحمي حسابك؟
ببساطة: تمنع أي حد يضيفك على الجروبات بدون إذنك
هتدخل على
الإعدادت Settings
الحساب Account
الخصوصية Privacy
المجموعات Groups
ولو انت بتثق في كل الأرقام اللي متسجلة عندك.. يبقى تختار
My Contacts جهات الاتصال لدي
وبكده مفيش أرقام غريبة هتضيفك على أي جروب بدون إذنك
انما أنا انصح انك تختار
My contacts except جهات الاتصال لدي باستثناء
ثم تدوس على زرار "تحديد الكل"
(على الأندرويد فوق وعلى الأيفون تحت)
وللأسف لازم تعمل كده كل ماتسجل عندك رقم جديد
 |
| خطوات الحماية على أندرويد |
 |
| خطوات الحماية على أيفون |
الخطوات دي هتمنع أي حد يضيفك على جروب واتساب بدون اذنك
لازم الأول يبعتلك دعوة في رسالة خاصة بينكم
وطبعا سهل تتجاهلها
يعني الخطوات دي مش بس تحميك.. لا.. دي كمان هتريحك من ازعاج اضافات الجروبات على الفاضي والمليان.
وحاول على قد ماتقدر تخرج من أي جروب انت فيه حاليا لو لا تثق في الأدمنز بتوعه
#واتساب_يترنح
#سجنال_متشفر
#تليجرام_متحرر